विराटनगर - मोरङ जिल्लास्तरीय ‘ए’ डिभिजन लिग फुटबल प्रतियोगितामा मोतीराम स्पोर्टिङ क्लब लिग विजेता बनेको छ । टेकबहादुर लिम्बूको ह्याट्रिकले मोतिरामलाई लिग विजेताको सुनिश्चितता गराएको हो ।

मोरङ जिल्ला फुटबल संघको आयोजनामा शनिबार विराटनगरको शहिद मैदानमा सम्पन्न फाइनल खेलमा मोतीरामले उर्लाबारी स्पोर्टिङ क्लबलाई ३–१ गोल अन्तरले पराजित गरेको छ । 

खेलको १८औं मिनेटमा टेकबहादुर लिम्बूले पहिलो गोलबाट मोतीरामलाई अग्रता दिलाएका थिए । ४१औं मिनेटमा पुनः टेकबहादुरले टिमका लागि दोस्रो गोल गरे ।पहिलो हाफको निर्धारित अन्तिम ४५औं मिनेटमा उर्लाबारीका लागि सौरज राउतले गोल फर्काएर मोतिरामलाई रोक्ने प्रयास गरेका थिए । तर दोस्रो हाफमा उर्लाबारी खेलमा फर्किन नसक्दा ७० औं मिनेटमा टेक बहादुरले तेस्रो गोल गर्दै मोतिरामलाई जिल्ला स्तरीय ‘ए’ डिभिजन लिग विजेता गराए । उनले खेलको म्यान अफ द म्याच बन्दै नगद पाँच हजार रुपैयाँ प्राप्त गरेका थिए । 

प्रतियोगिताको विजेता मोतीरामले नगद ५० हजार रुपैयाँ प्राप्त गरेको छ । विजेता टोलीलाई विराटनगर महानगरपालिकाका प्रमुख भीम पराजुलीले ट्रफी हस्तान्तरण गरे । त्यसैगरी उपविजेता उर्लाबारीले नगद २५ हजार रुपैयाँ र ट्रफी प्राप्त गरेको छ । 

प्रतियोगितामा विजेता मोतीराम र उपविजेता उर्लाबारीसहित नवप्रगतिशील क्लव, साइनो स्पोर्टिङ क्लव, युनाइटेड स्पोर्टिङ क्लव, बेलबारी फुटबल क्लव, श्री हरैंचा स्पोर्टिङ क्लव र सम्राट स्पोर्टिङ क्लव गरी आठ वटा क्लवको सहभागीता रहेको थियो ।