कोशीमा अध्यादेशबाट ल्याइएको बजेट प्रस्तुत हुँदै
विराटनगर - कोशी प्रदेश सरकारले अध्यादेशबाट ल्याएको आब २०८०/८१ को वार्षिक बजेट आर्थिक मामिला तथा योजना मन्त्रालयको सभाहलमा प्रस्तुत हुने भएको छ ।
सोही मन्त्रालयको मन्त्रीको समेत जिम्मेवारी सम्हालिरहेका मुख्यमन्त्री हिक्मत कुमार कार्कीले आजै बजेट प्रस्तुत गर्न लागिरहेका छन् ।
सरकारले बजेट नै नल्याइ बुधबार बजेट अधिवेशन अन्त्य गरेर अध्यादेशबाट बजेट ल्याएको हो । सरकारको सिफारिसमा कोशी प्रदेशको आर्थिक अध्यादेश २०८० र प्रदेश विनियोजन अध्यादेश २०८० लाई प्रदेश प्रमुख परशुराम खापुङ्गले प्रमाणीकरण गरि बिहिबार बिहान जारी गरेका हुन् ।
नीति तथा कार्यक्रम र बजेटको मुखमा सत्ता परिवर्तनको खेल सुरु हुँदा कोशी प्रदेशको बजेट नै अध्यादेशबाट ल्याउनु पर्ने अवस्थामा सरकार पुगेको हो ।
सत्ता साझेदार जसपा र माओवादी केन्द्रले नीति तथा कार्यक्रम र बजेटको मुखमा सरकारलाई दिएको समर्थन फिर्ता लिएको छ । दुई दलले समर्थन फिर्ता लिएपछि मुख्यमन्त्री हिक्मतकुमार कार्की अंक गणितले अल्पमतमा परेका छन् ।
प्रतिपक्षी दलहरूले भने अल्पमतमा परेको सरकारले संविधान छलेर अध्यादेशबाट बजेट ल्याएको भन्दै विरोध जनाइरहेका छन् ।
