जनकपुरधाम : प्रथम गणतान्त्रिक शहिद दुर्गानन्द झाका श्रीमती काशीदेवीलाई नेपाली कांग्रेस तरुण  विभाग प्रदेश नं २ ले सम्मान गरेको छ ।  कांग्रेसका केन्द्रीय सदस्य एवं कांग्रेस तरुण विभागका प्रमुख शंकर भण्डारीले शनिबार शहीद झाको पैतृक गाउँ जटहीमा उनलाई सम्मानका साथै शहिद झाको गणतान्त्रिक योगदानको सम्मानपत्र हस्तान्तरण गरेका हुन् । 

सम्मानपत्रमा लोकतन्त्र, गणतन्त्र, संघीयता, बहुलवाद, धर्मनिरपेक्षतासहितको लोकतान्त्रिक व्यवस्था ल्याउन आफ्नो अमूल्य जीवन न्यौछावर गर्ने अमर शहिद झाप्रति श्रद्धासुमन अर्पण र परिवारजनप्रति उच्च सम्मान व्यक्त गर्न पाउँदा गर्वको अनुभूति भएको उल्लेख छ । 

सो अवसरमा विभागका केन्द्रीय सदस्य एवं प्रदेश नं २ का संयोजक रामपल्टन साह, कांग्रेस धनुषा कार्य समिति सदस्य प्रवेश चौधरीले शहिद झाको नेपालमा गणतान्त्रिक शासन पद्धतिको स्थापनाको संकल्प, योगदान र राजा महेन्द्रमाथि बम प्रहार प्रसंगको चर्चा गरेका थिए ।  (रासस)