सुर्खेत । सुर्खेतको वीरेन्द्रनगर नगरपालिकाले यही भदौ अन्तिम साताबाट मुख्य बजार क्षेत्रका अबैध संरचनाहरु हटाउन सुरुवात गरेको छ । मुख्य बजारमा सडक स्तरोन्नतिको काम भइरहेकाले मंगलगढीदेखि गणेशचोकसम्मको सडकका संरचनाहरु हटाउन सुरुवात गरिएको हो । 

यसका लागि नगरपालिकाले सात दिने अल्टिमेटम दिई संरचना हटाउन अटेरी गरे सरोकारवाला निकाय र सम्बन्धित घर जग्गाधनीलाई प्रचलित कानुनअनुसार कारबाही गरिने समेत सूचना जारी गरेको थियो । 

यो अवधिमा न बजार क्षेत्रमा अव्यस्थित रूपमा निर्माण गरिएका संरचना हटाइएको छ न त फुटपाथ मिचेर गरिँदै आएका व्यवसायको व्यवस्थापन नै भएको छ । नगरपालिकाकाले सडक क्षेत्र खाली गर्न सूचना जारी गर्नुको मुख्य कारण थियो, एक वर्षदेखि अलपत्र मुख्य बजार क्षेत्रको सडक विस्तार योजनाको काम अघि बढाउनु। तर, उक्त सूचनाको समेत बेवास्ता गरिएको छ । 

नगरपालिकाकाले सडक क्षेत्र खाली गर्न यसअघि पटक–पटक सरोकारवालासँग छलफल र अनुरोध गरेपनि त्यस्ता संरचना नहटाएपछि सात दिने सूचना नै जारी गरेको थियो । अहिले नगरपालिकाले दिएको समयावधि सकिएपछि मुख्य बजार क्षेत्रमा रहेका विद्युतका पोल, नेपाल टेलिकम तथा इन्टरनेट प्रदायक संस्थाका तारहरु तथा सडक किनारामा पर्ने रुख तथा भौतिक संरचना हटाउन थालेको हो ।

१ हजार ७ सय मिटर सडक विस्तार गर्नुपर्ने भएकाले सडकका दुवै किनारामा रहेका अवैध संरचना हटाउन यसअघि नै जारी सूचनाअनुसार बुधबारदेखि काम थालिएको प्रमुख प्रशासकीय अधिकृत नरहरी तिवारीले जानकारी दिए ।
नगरपालिका अझै पनि ‘एक्सन’ मा भने जान जान नसक्दा लामो समयदेखि सडक स्तरोन्नति र फुटपाथ व्यवस्थापनको योजना अलपत्र परेको छ ।

नगरपालिकाले अवैध संरचना हटाउने कामको थालनी गरिसकेको नगरप्रमुख मोहनमाया ढकालले बताइन् । अवैध संरचना हटाइसकेपछिसडक विस्तारको योजनाले गति लिने प्रमुख ढकालको भनाई छ  ।’  निर्माण सम्झौताअनुसार बजार क्षेत्रको सडक विस्तारको काम १८ महिनामा गरिसक्नुपर्ने भनिएको छ । सम्झौता भएको एक वर्ष बितिसक्दा पनि काममा उल्लेखनीय प्रगति भएको छैन । 

गत वर्ष भदौ १७ गते सडक स्तरोन्नतिका लागि सम्झौता भएको थियो । निर्माण कम्पनीले २०८० जेठ मसान्तसम्म उक्त सडक निर्माण गरिसक्नुपर्ने सम्झौतामा उल्लेख छ । समय निकै घर्किसक्दा पनि नगरपालिकालाई सडक क्षेत्रका संरचना हटाउनमै हम्मेहम्मे परेको छ । विद्युत, खानेपानीजस्ता सेवा प्रदायक निकायले समेत आफ्ना संरचना सार्न ढिलाइ गर्दा पनि सडकको काम प्रभावित बनेको हो ।

यता ठेकेदार कम्पनीले ‘साइड क्लियर’ नभएकै कारण निर्माणको काम अपेक्षित रूपमा अघि बढ्न नसकेको बताउँदै आएको छ । सो सडकसहित बजार क्षेत्रका अन्य केही भित्री सडकहरूको स्तरोन्नतिको जिम्मा खड्का निर्माण सेवा बाँकेले पाएको छ । पूर्वाधार विकास निर्देशनालयले निर्माण कम्पनीसँग सडक विस्तारका लागि ठेक्का सम्झौता गरेको हो । 

वीरेन्द्रनगरको मंगलगढीदेखि गणेशचोकसम्म हाल सात मिटर चौडा सडक रहेकोमा त्यसलाई स्तरोन्नति गरी १५ मिटर चौडाइको बनाइँदै छ । व्यापारीहरूले बजार क्षेत्रको फूटपाथ कब्जा गर्दा सडक स्तरोन्नतिसँगै ट्राफिक व्यवस्थापनमा समेत चुनौती थपिएको छ । अव्यवस्थित रूपमा संरचना निर्माण गरेर बसेकालाई हटाउन समस्या भइरहेको छ ।