धनगढी : कैलालीमा बसको ठक्करबाट मोटरसाइकल चालकको मृत्यु भएपछि आक्रोशित आफन्तले पूर्वपश्चिम राजमार्ग अवरुद्ध पारेका छन् । जिल्लाको लम्की खण्डमा स्थानीयले राजमार्ग अवरुद्ध पारेका हुन् । 

बिहीबार गौरीगंगा नगरपालिकाको राजीपुरमा बसको ठक्करबाट मोटरसाइकल चालक लम्कीचुहा नगरपालिका–४ का २७ वर्षीय लालितजंग रावतको मृत्यु भएको थियो । जिल्ला प्रहरी कार्यालय कैलालीका प्रहरी नायव उपरीक्षक भरत चौधरीका अनुसार मृतकका आफन्तले क्षतिपूर्ति तथा दोषीलाई कारबाहीको माग गर्दै शुक्रबार बिहानैदेखि लम्कीको बौलियामा टायर बालेर सडक अवरुद्ध पारेका हुन् । प्रहरीले ठक्कर दिने बस चालकलाई नियन्त्रणमा लिएको जनाएको छ । 

बिहीबार पश्चिमबाट पूर्वतर्फ गइरहेको ना ४ ख ३७२९ नम्वरको बसले सोही दिशातर्फ गइरहेको म ८ प नम्‍बरको ३९८० नम्बरको मोटरसाइकललाई ठक्कर दिँदा उनी घाइते भएका थिए । घाइते भएका उनको धनगढीस्थित माया मेट्रो अस्पतालमा उपचारका क्रममा मृत्यु भएको थियो ।