काठमाडौँ – प्रमुख प्रतिपक्षी नेकपा एमाले सांसद् योगेश भट्टराईले सभामुख अग्नि सापकोटाले सबै दललाई समान व्यवहार नगरेको आरोप लगाएका छन् । सभामुखले निष्पक्ष भूमिका निर्वाह नगरेका कारण आफ्नो दलले विरोध गर्नु परेको उनले बताएका छन् । 

बुधबार बसेको प्रतिनिधिसभाको बैठकबाट बाहिरिने क्रममा सञ्चारकर्मीहरूसँग उनले यस्तो प्रतिक्रिया दिएका हुन् । दलले ह्वीप जारी गरेर निष्काशन गरेका आफ्ना दलका सांसदहरूलाई कारबाहीको सूचना जारी नगरेर सभामुख सापकोटाले एमाले फुटाउन सघाएको भट्टराईको दाबी छ ।

‘सभामुखले निष्पक्ष व्यवहार नगरेको हाम्रो टिप्पणी छ । उहाँले एउटै केशका विभिन्न दलहरूलाई विभिन्न ढंगले ट्रिट गर्नुभएको छ । संसदीय व्यवस्थामा पार्टी नै प्रदान हुन्छ । पार्टीका सांसदहरूलाई पार्टीको अनुशासन हुन्छ,’ भट्टराईले भने, ‘त्यो अनुशासन उलंघन भयो भने, ह्वीप उलंघन भयो भने कारबाहीको सूचना दिन्छ । त्यो सूचनालाई जारी गर्न सभामुखले निष्पक्ष भूमिका खेल्नु भएन ।’

बुधबार अपराह्न ४ बजे बसेको प्रतिनिधि सभा बैठकमा एमाले सांसद्ले अवरोध गरेका थिए । एमालेको अवरोधबीच सत्तारुढ दलले दलसम्बन्धी अध्यादेश निष्क्रिय बनाउनका लागि सभामुखसमक्ष पेस गरेका छन् ।