कैलालीमा गैँडाको खागसहित एकजना पक्राउ
पुस २०, २०७७
कैलाली : गैँडाको खागसहित प्रहरीले एक जनालाई पक्राउ गरेको छ । जिल्लाको बर्दागोरिया गाउँपालिका-४ का ५८ वर्षीय नैनबहादुर कठरियालाई प्रहरीले पक्राउ गरेको हो ।
संघीय प्रहरी कार्यालय धनगढीबाट खटिएको प्रहरी टोलीले पूर्वपश्चिम राजमार्गअन्तर्गत छतिवन सामुदायिक वन नजिकै ना ३ स ५७१८ नम्बरको अटो रिक्सामा राखिएको अवस्था खागसहित कठरियालाई पक्राउ गरेको हो ।
संघीय प्रहरी कार्यालय धनगढीका प्रमुख प्रहरी वरिष्ठ उपरीक्षक नलप्रसाद उपाध्यायले सिभिलमा गएको समूहले सुखडबाट ४ किलोमिटर पूर्व सामुदायिक वन क्षेत्रमा गैडाको खाँगसहित कठरियालाई नियन्त्रणमा लिएको जानकारी दिए । कठरियालाई आवश्यक कारबाहीका लागि वन कार्यालयमा बुझाउने तयारी भइरहेको उपाध्यायले बताए ।
